鋪面

室內環境

石鍋蒜香牛肉飯+柚子蜜梳打

石鍋蒜香牛肉飯

偶爾過哩鴨寮街，咁就順便行埋西九龍中心，見到有間和亭食日本嘢，望入去感覺都好似熟口熟面，再晌門口睇清楚D，啊，原來又係和民嘅另一品牌，即管試試啦！

坐落睇睇餐牌，見有午市定食，都幾抵吓，一般都係三十幾到四十幾，又包埋麵豉湯、沙律同飲品，點知想叫嘅時候望真D細字，原本只做星期一至五，星期六、日唔供應，唯有散叫，都無所謂啦，係食得貴D啫，唔怪之得隔離檔$41.9嘅任食壽司就排晒長龍要等位，和亭就稍為「靜蠅蠅」啦！

唔理得咁多，醫肚最實際！叫咗個石鍋蒜香牛肉飯（$39），餐牌標明係新嘢，所以諗住試吓，另外加杯柚子蜜梳打（$10），炎炎夏日梗係整杯冰凍嘅飲品醒醒神！個石鍋飯嚟到，賣相好似吉野家牛肉飯咁，好彩佢夠晒熱力逼人，仲聽到滋滋聲咁響，新鮮製作嘅表現，食落口飯粒分明，又充滿蒜香味，但係D牛肉始終無乜特別，我覺得同吉野家嘅牛肉無乜分別！至於杯柚子蜜梳打就仲失望，原因好簡單，叫柚子蜜但係無乜柚子味，杯底一撮柚子皮又好硬，頂多佢只可以叫做一杯冰凍嘅梳打水！加埋一成五十幾，夠去兩次吉野家啦。


菜式: 日本菜
電話: 27251225
地址: 深水步 西九龍中心6樓620號舖

呵...我都去過
果次仲有壽司食
但係佢整到好樣衰
搞到最後都係食左一件咋><